Deklarimi vjetor

Çdo vit, deri më 31 janar, anëtarët e IKM deklarojnë aktivitetin e vitit paraardhës dhe gjendjen e punësimit të tyre. Deklarimi është detyrim statutor i çdo anëtari dhe baza mbi të cilën Komiteti i Regjistrimit dhe Licencimit ripërtërin licencat, përditëson Regjistrin Publik dhe përgatit programin vjetor të Kontrollit të Menaxhimit të Cilësisë.

Dy deklarata

• Deklarata Vjetore e aktivitetit — paraqet aktivitetin e anëtarit si Kontabilist i Miratuar gjatë vitit: për të vetëpunësuarit dhe Shoqëritë e Kontabilitetit, subjektet të cilave u janë ofruar shërbime; për të punësuarit, subjektin dhe pozicionin e punës.
• Deklarata Personale e Punësimit — vetëdeklarimi i të gjitha punësimeve aktuale të anëtarit, me të dhënat e identifikimit dhe të dëshmisë profesionale. Çdo ndryshim i punësimit deklarohet brenda 15 ditëve, me një deklaratë të re.

Të dyja deklaratat dorëzohen nga të gjitha kategoritë e anëtarëve: të vetëpunësuar, Shoqëri Kontabiliteti, të punësuar dhe jo-aktivë.

Çfarë duhet përgatitur

Formulari plotësohet në disa hapa dhe mund të ruhet gjatë plotësimit. Para fillimit, është e dobishme të jenë gati:

• dëshmia profesionale ose certifikata si Kontabilist i Miratuar — numri dhe viti i lëshimit (jo numri i protokollit dhe jo viti i përfundimit të provimeve); anëtarët pa dëshmi deklarojnë vitin e dokumentit të lëshuar me vendim të Ministrisë së Financave ose vitin e përfundimit të provimeve;
• të dhënat personale: emri, atësia, mbiemri, numri personal i mjetit të identifikimit, dega ose seksioni, adresa e emailit dhe numri i kontaktit;
• për të vetëpunësuarit: NUIS-i, emri tregtar i regjistruar në QKB, numri i të punësuarve dhe, kur ka Kontabilistë të Miratuar të punësuar, emri dhe numri i dëshmisë së secilit;
• për të punësuarit: subjekti ose institucioni, NIPT-i, sektori, pozicioni i punës dhe lloji i punësimit, me kohë të plotë ose të pjesshme;
• për të vetëpunësuarit dhe Shoqëritë e Kontabilitetit: lista e subjekteve klientë të vitit, me emrin tregtar, NUIS-in, formën ligjore, llojin e aktivitetit, llojin e shërbimit të ofruar dhe numrin e të punësuarve të subjektit;
• një fotografi në format pasaporte (jpg ose png, deri në 2 MB), e emërtuar “Emër Atësi Mbiemër – Foto ID” — opsionale, për përditësimin e të dhënave të anëtarësisë.

Si plotësohet

1. Të dhënat personale — identifikimi dhe kontaktet.
2. Të dhënat si Kontabilist i Miratuar — dëshmia ose certifikata dhe kategoria e punësimit: aktiv i vetëpunësuar, aktiv i punësuar, aktiv në Shoqëri Kontabiliteti, ose jo-aktiv.
3. Punësimi — seksioni që i përgjigjet kategorisë së zgjedhur.
4. Vetëdeklarimi i punësimit — numri i punësimeve aktuale dhe lista e tyre sipas formatit të treguar në formular, e shoqëruar me deklaratën se informacioni është i saktë dhe i vërtetë.
5. Formulari i aktivitetit — vetëm për të vetëpunësuarit dhe Shoqëritë e Kontabilitetit: ngarkimi i tabelës së subjekteve klientë.
6. Fotografia dhe dorëzimi — pas dorëzimit shfaqet konfirmimi; formulari nuk mbyllet dhe nuk rifreskohet derisa të shfaqet ai.

Si përdoren deklaratat

Deklaratat verifikohen çdo vit nga Komiteti i Regjistrimit dhe Licencimit, i cili saktëson nëse anëtari vijon të plotësojë kushtet për licencën dhe nëse kategoria e tij ka ndryshuar. Mbi këtë bazë përgatitet, brenda tremujorit të parë, lista e anëtarëve që pajisen me licencë për vitin përkatës dhe përditësohet Regjistri Publik. Të dhënat për subjektet klientë përdoren nga Komiteti i Menaxhimit të Cilësisë për përzgjedhjen e anëtarëve dhe të dosjeve të punës për kontroll. Informacioni i deklaruar është konfidencial dhe bëhet publik vetëm kur e lejon anëtari ose kur e kërkojnë organet kompetente sipas ligjit.

Dosja për çdo kontratë shërbimi

Për çdo kontratë për kryerjen e shërbimeve dhe në zbatim të saj, anëtarët Kontabilistë të Miratuar krijojnë një dosje të veçantë me të dhëna të plota, sipas formatit të miratuar nga Këshilli i Drejtimit. Dosja ruhet për një afat pesëvjeçar dhe paraqitet sa herë që e kërkojnë organet drejtuese të IKM.

Mosdorëzimi i deklaratave

Deklaratat janë kusht për ripërtëritjen e licencës dhe për përfshirjen në Regjistrin Publik si aktiv. Mosdorëzimi i tyre, si dhe deklarimi i pasaktë i punësimit ose i aktivitetit, trajtohet si shkelje e Statutit dhe i përcillet për shqyrtim Komitetit të Investigimit.

Baza ligjore

Në përputhje me nenin 4 të Statutit të IKM “Të drejtat dhe detyrimet e anëtarëve Kontabilist të Miratuar”, anëtarët e Institutit dorëzojnë çdo vit Deklaratën Vjetore të aktivitetit dhe Deklaratën Personale të Punësimit, si dhe mbajnë një dosje të veçantë për çdo kontratë shërbimi.

Për pyetje rreth deklarimit vjetor, stafi i IKM është i gatshëm të ndihmojë në ikm.alb@gmail.com ose nëpërmjet faqes Kontakt.