Certifikimi për Kontabilist Ligjor

Programi i Certifikimit “Kontabilist Ligjor” është një program i specializuar i Institutit të Kontabilistëve të Miratuar, i zhvilluar në kuadër të projektit të Bankës Botërore për forcimin e raportimit financiar, auditimit dhe qeverisjes korporative. Ai synon krijimin e ekspertizës profesionale në kontabilitetin ligjor, në ekzaminimin e mashtrimeve financiare, në hetimin e krimeve ekonomike dhe në mbështetjen e proceseve gjyqësore me ekspertizë financiare.

Programi mbështetet në praktikat dhe standardet ndërkombëtare të kontabilitetit ligjor dhe të ekzaminimit të mashtrimeve, në referencat e organizatave ndërkombëtare të specializuara dhe në kuadrin evropian për parandalimin e pastrimit të parave dhe luftën kundër krimit financiar, i përshtatur me praktikën institucionale shqiptare dhe me legjislacionin rajonal. Qëllimi i tij është përgatitja e profesionistëve që identifikojnë, analizojnë dhe dokumentojnë raste mashtrimesh financiare, korrupsioni, shpërdorimi të aktiveve dhe veprash të tjera ekonomike.

Kujt i drejtohet programi

• Kontabilistëve të Miratuar, anëtarë të IKM;
• Audituesve Ligjorë;
• punonjësve të organeve të zbatimit të ligjit, si institucionet e sistemit të drejtësisë dhe administrata tatimore e doganore.

Çfarë ofron certifikimi

Pjesëmarrësit në program fitojnë:

• njohuri të specializuara në kontabilitetin ligjor dhe në ekzaminimin e mashtrimeve;
• njohuri mbi skemat e mashtrimit, të korrupsionit dhe të krimeve ekonomike;
• aftësi praktike për hetimin dhe analizimin e rasteve komplekse financiare;
• kompetenca në mbledhjen dhe vlerësimin e provave financiare dhe jofinanciare;
• aftësi për përgatitjen e raporteve profesionale dhe për mbështetjen e proceseve gjyqësore;
• një certifikim profesional me vlerë të shtuar për karrierën dhe zhvillimin profesional.

Programi i certifikimit

Programi përfshin 10 module profesionale dhe 64 orë trajnimi. Tematikat kryesore përfshijnë ekzaminimin e mashtrimeve, psikologjinë e mashtruesit, procesin investigativ, provat financiare, skemat korruptive, mashtrimet në epokën digjitale dhe procesin e rikuperimit të dëmit.

Kalendari i edicionit 2026

Trajnimi zhvillohet në katër javë, nga 10 Shtatori deri më 17 Tetor 2026. Çdo javë ka tri seanca: të enjten dhe të premten nga 4 orë, ndërsa të shtunën 8 orë.

Java	Datat	Orë
Java 1	10 – 12 Shtator 2026	16
Java 2	17 – 19 Shtator 2026	16
Java 3	8 – 10 Tetor 2026	16
Java 4	15 – 17 Tetor 2026	16
Gjithsej	12 ditë trajnimi	64

Për pyetje rreth certifikimit “Kontabilist Ligjor”, stafi i IKM është i gatshëm të ndihmojë në ikm.alb@gmail.com ose nëpërmjet faqes Kontakt.